LAOAG CITY – Nabiktima ti maysa a turista idiay Pagudpud, Ilocos Norte babaen kadagiti dua nga aglaklako ti ikan.
Daytoy ti inbatad ni Mr. Joe Tayawa, maysa nga CPA ken managing partner ni Tayawa iti CPA & Company Auditing Firm, taga Pamplona, Cagayan ngem residente idiay Manila.
Segun kenni Tayawa, naggapo idiay Manila ken agawid idiay Cagayan ngem dimmagas iti nasao nga ili tapno gumatang ti ikan.
Inlawlawag na a gimmatang isuna ti ikan a nagdagsen ti 2.2 a kilo ngem kuna ti aglako a no gatangen na pay ti babassit nga ikan ket adda ti discount na.
Inbatad na a ti kilo dagiti amin a ginatang na ket 7 a kilo ken naikkan pay ti libre nga ice para iti ikan.
Nupay kasta, idi isupot ti baket nga aglako dagiti ikan ket napan pay ti maysa nga aglako ken indiaya na ti lako na a sugpo ken pusit.
Ginatang na amin dagitoy ngem nakita na ti maysa a supot nga adda iti suli isut gapo na a dinamag na no kukua na pay dagitoy ngem kuna ti baket a saan a karaman daytoy kadagiti ginatang na.
Inbatad na nga idi ipakuntar na amin dagiti ginatang na ket nagboluntrayo ti maikadua nga aglako nga isuna ti mangkuntar ket agbalor amin daytoy ti 3, 325 a pisos ngem pinabayadan da lattan ti 3, 300 a pisos.
Innayon na nga inikkan pay ti baket ni Tayaw ti karamay nga adda iti plastic bottle.
Inlawlwag ni Mr. Joe Tayawa a bayat a nakalabes iti viaduct iti pagudpud ket naamiris na sobra ti nabayadan na.
Nagsubli da iti naggatangan na ken pinakuntar na manen ket naamoan na a nagsobra ti 555 a pisos.
Naamoan a pinakilo na manen dagiti ikan ket ditoy manen a nakita na a kurang ti 2.2 a kilo.
Gapo iti daytoy, ginandat ni Tayawa nga ipan dagitoy iti municipyo ken kuerpo ti pulisya tapno ireklamo ngem dimmawat da ti pammakawan.
Inbatad na a gapo ta naasyan kadagiti aglaklako ket saan na nga inreklamo ngem binagaan na dagitoy a saan da nga uliten ti mangkulo kadagiti gumatgatang ti kalo da.
Inbatad ni Mr. Joe Tayawa a bayat a nakadanon iti balay da ket inpakilo na dagiti ginatang na nga ikan.
Naduktalan na a 10 a kilo laeng ti kadagsen dagiti ikan ngem ti binayadan na ket 11. 5 a kilo.
Gapo iti daytoy, kuna ni Tayawa a namintallo isuna a naluko babaen kadagiti dua a naggatangan na kadagiti ikan.
Kalpasan daytoy ket napanunut na nga i-post iti facebook tapno maamoan dagiti am-ammo ken papagayam na.
Mainaig iti daytoy, saan a napanunut ni Tayawa nga aramiden dagiti aglaklako kenkuana ti kapadasan na.
Innayon na a daytoy ti kaunaan a gundaway a nabiktima isuna babaen kadagiti aglaklako iti nasao a lugar.
