LAOAG CITY – Nagyaman ni Police Col. Cesar Pasiwen kadagiti kameng ti PNP ditoy probinsya iti naiget a suporta kadagiti programa.
Daytoy ket kalpasan ti turn over ceremony iti Ilocos Norte Police Provincial Office.
Kuna na a saanen a kasapulan ti briefing iti sumaruno a provincial director gapu ta dati a nagpaay ditoy probinsya.
Simmukaten ni Police Col. Christopher Abrahano, kas acting provincial director ditoy probinsya.
Immuna iti daytoy, kiniddaw ni Police Brig. Gen. Joel Orduña, regional director ti PNP Region 1 ti napintas a serbisyo kadagiti umili ditoy Ilocos Norte.
Kuna na a masapul a maitultuloy ti kinalinak urnos ken talna ti probinsya ken dagiti kampanya kontra ti iligal a druga, iligal gambling ken dadduma pay.
Mainaig iti daytoy, inpasingked ni Abrahano nga ikarigatan na ti agserbi ken liklikan na iti agkamali.
Kuna na a babaen ti tulong ken suporta dagiti kakadua na iti serbisyo, ken dagiti lokal a gobyerno ket maaramid a naimbag ti trabaho da.
Ni Abrahano ket nagpapaay kas chief of police iti probinsya ti Pangasinan ken iti CIDG.
Naamuan a ni Col. Pasiwen ket agserbi kas Chief of Staff iti Calabarzon iti Region 4A.
Kinadlaawan met ni Gov. Matthew Marcos Manotoc dagiti maseknan ken kiniddaw na iti acting provincial director iti panangitultuloy na dagiti naggapuanan ti dati a provincial director.
