LAOAG CITY – Nakasagana ni Presidente Ferdinand Marcos Jr. nga isubli idiay Amerika ti ginatang a Typhon missile system no agsardeng ti China iti pananghar-harass ken panangagom iti teritorio ti Pilipinas.
Inbatad ni Pres. Marcos a saanna a maawatan no apay nga agkomkomento ti China iti nasao a missile systems.
Masdaaw pay ni Marcos a saan met a mangipapaay ti komento ti Pilipinas kadagiti missile systems a napigpigsa pay kadakuada ngem iti armas ti pagilian.
Gapu iti daytoy, kinaritna ti China a maaddaanda ti katulagan tapno isardeng ti panangagomda iti teritorio, isardeng ti pananghar-harras kadagiti mangngalap ken palubosanda a makabirok ti pagbiagan dagiti Pilipino.
Malaksid iti daytoy, inpettengna a nasken nga agsardeng pay ti China ti panangdungpar kadagiti bangka dagiti mangngalap, panang-water cannon kadagiti Pilipino, panag-laser ken ti coercive behavior..
Naammoan a ti Typhon missiles system ket kabaelanna a mangipatayab ti missiles wenno aniaman a paset iti Exclusive Economic Zone (EEZ) ti Pilipinas.
