LAOAG CITY – Inpakaammo ni Mrs. Divine Sevilla, Counseling Professional ken mangidadaulo ti Speak Up I’m Here ti gobierno probinsial a gagangay laeng a mabuteng dagiti ubbing a sumrek iti pagadalan.
Segun kenkuana, daytoy ket gapu ta damo a maisina dagiti ubbing kadagiti nagannakda nangruna no saanda a nasanay a makilangen-langen kadagiti pada dagitoy nga ubbing iti pagtaenganda.
Inbatadna a dagiti nursery ken kindergarten ti kangrunaan a makapaspasar iti daytoy a situasion gapu ta mangrugrugida pay laeng a makigayyem ken makiam-ammo kadagiti padada nga ubbing.
Inlawlawagna a dagiti dadduma met nga estudiante a mabutbutengda nga agsubli iti panagbasada gapu ta posible nga adda ti pannakariknada a mailanglangi kadagiti dadduma a kaklaseda wenno makapaspasar ti panag-bully.
Kunana nga adda met dagiti ar-aramiden a wagas dagiti mangisursuro tapno ad-adda a magutigutda a sumrek iti klasrum a saanda a kadua dagiti nagannakda.
Innayonna a napateg a maikkan ti gundaway dagiti ubbing a makiay-ayam kadagiti padada nga ubbing tapno saandanto a makigtot wenno mabuteng apaman a sumrekda iti pagadalan.
