LAOAG CITY – Naiget a kontraen ni Mr. Herdy Yumol, professor iti Mariano Marcos State University (MMSU) idiay ciudad ti Batac ti nailungalong a maipababa iti siyam a tawen dagiti mapatawan ti pannusa.
Inpetteng na a saan a maiparbeng a dagiti maipatpataw a pannusa kadagiti nataengan ket isu met ti maipataw a pannusa kadagiti ubbing.
Inbatad ni Yumol a dagiti ubbing nga agar-aramid ti krimen ket isuda dagiti saan a napadakkel a nasayaat dagiti nagannak da.
Gapu ti daytoy, inpalgak na a saan a dagiti ubbing ti madusa no di ket rumbeng laeng a dagiti nagannak.
Innayon na a dagiti ubbing nga us-usaren dagiti sindikato ket saan nga isuda ti mapatawan ti pannusa no di ket dagiti mismo a sindikato.
Kuna pay ni Yumol a dagiti ubbing nga agbasol ket masapol a masalbar babaen ti pannakaipan da ti rehabilitation gapu ta naganus pay ti panunot da isut gapuna a saan da pay nga ammo ti dakes ken saan.
