LAOAG CITY – Natay ti maysa nga ubing a babai nga agtawen ti dua kalpasan a nauram dagiti dua a lugan a nakagarahe iti Brgy. 24 Nagrebcan iti ili ti San Nicolas
Nabigbig ti biktima na ni Alicia Zyra Aguinaldo, agtawen ti dua ken residente iti nasao a barangay.
Basar iti impormasyon a nakalap ti Bombo Radyo, naminpinsan a nauram dagiti nakagarahe a lugan a maysa a Revo nga addaan ti plate number XGC 904 ken ti maysa a van nga addaan ti plate number RBK 795.
Rumrumwar a ti biktima nga ubing ket adda iti uneg ti revo bayat ti uram.
Nagtinnulong dagiti kameng ti Bureau of Fire Protection iti ili ti San Nicolas ken ditoy siudad ti Laoag idinto a tallo a fire truck dagiti nausar.
Nasebseban dagiti bombero ti uram ken saan pay amasinunuo ti makagapu ti pannakauram dagiti dua a lugan a nakairaman ti ubing a poon ti nakatayan.
