LAOAG CITY – Inyistorya a mismo ti maysa a Grade 2 pupil a lalaki iti maipagarup a dandani a pannakasibrong na babaen iti puraw a van iti Sitio Dos, Barangay Cavit ditoy ciudad ti Laoag.
Segun ti ubing, intar-tarayan isuna dagiti kakadwa na a napan nagpaskua idi sinarde-sardengan isuda ti maysa a puraw a van.
Kunana a nakita na iti dua a lallaki a nakalugan iti nadakamat a van ngem saanna a maibaga no adda pay iti kakadwa dagitoy iti likod ti van.
Inbatad na a gapu iti amak ken buteng na, nangpidot daytoy iti bato nga isu iti mabalin na nga ibakal kadakuada no bumaba dagiti nakalugan ti van.
Nupay kasta, apaman a nakadanon ti ubing iti batog ti day care center ket eksakto met a sumungad ti lalaki a nakamotorsiklo ket ditoy a dagus nga immadayon ti nadakamat a van.
Mainaig iti dayta, segun ti ubing a nakadwa na a napan nagpaskua, intar-tarayan da daytoy agsipod ta nagpabati ti ubing ket ditoyen a sinardengan daytoy ti puraw a van.
Kabayatanna, inpasingked ni Brgy. Chairman Jerry Alonzo nga awan iti panagliway dagiti barangay tanod a nangbanbantay iti CCTV iti uneg ti barangay hall.
Kunana a saan da nga inekspektar ti napasamak nupay nakita da iti CCTV iti motorsiklo, van ken ti ubing nga agtartaray.
Gagem ti opisyal a manayonan dagiti barangay tanod nga agbantay ken agsursur iti lugar da.
Malaksid iti dayta, kalikagum da pay a mangala iti kalidad a CCTV.
Nagbalakad ni Alonzo a liklikan a mapan agpaskua iti rabii ken saan nga agwarang-warang dagiti ubing iti kalkalsada.
Kabayatanna, inpasigurado ni P/Lt. Col. Amador Quiocho ti Chief of Police ditoy ciudad ti Laoag nga imbestigaran da ti maipagarup a dandani a pannakakumaw ti nasao nga ubing.
Daytoy ket iti laksid nga awan pay ti nagbalin a report dagiti maseknan mainaig ti nasao a pasamak.
Kunana a mapan ti PNP iti mismo a nakapasamakan ken adaelen da no pudno iti nasao nga insidente.
