LAOAG CITY – Maysa nga ubing a lalaki idiay India ti nakagun-od ti baro a world record gapu iti kinaalistona nga ag-compute kadagiti numero.
Kinumpirmaran ti records keeping organization a Guinness World Records a ti agtawen ti 13 a ni Aaryan Shukla ti Maharashtra, India ti baro a record holder ti titulo a “fastest time to mentally add 50 five-digit numbers.”
Daytoy ket kalpasan a naka-compute kadagiti numero babaen laeng ti utekna iti uneg ti 25.19 seconds.
Naka-televise ti record breaking attempt ni Aaryan iti “Lo Show dei Record”. Bayat a nakatakder iti entablado, nakasango ni Aaryan iti maysa a dakkel nga screen no sadinno nga alisto nga agpa-flash dagiti numero a kasapulanna a kuntaren.
Iti kinaalisto ti panag-flash dagiti numero, arig saan a mabasa dagiti live audience dagitoy. Kalpasan a maipakita ti maudi a numero iti screen, sumagmamano a segundo laeng ti masapol ni Aaryan tapno ma-compute nga husto dagitoy.
