LAOAG CITY – Inyistorya ni Mr. Macmac Alonzo iti Sitio Dos, Barangay Cavit ditoy ciudad ti Laoag ti naimatangan na mainaig iti maipagarop a pananggandat ti puraw a van a mangkumao ti maysa a Grade 2 pupil a lalaki iti nasao a barangay idi rabii.
Iti eksklusibo nga interview ti Bombo Radyo Laoag ken ni Alonzo, inbatad na a kabayatan ti panagawid na manipod iti Barangay Cabungaan a nakamotorsiklo ket nakita na ti saanen a nabigbig nga ubing a lalaki nga agtartaray ken agsangsangit a sarsarunwen ken arigna ab-abayen ti puraw a van.
Gapu iti daytoy, inpaigid na ti motorsiklo na ken inasitgan na ti ubing ken sinaludsud na no apay nga agtartaray ken agsangsangit.
Insungbat ti ubing nga intarayan dagiti kakadwa na a napan nagpaskua ken ay-ayaban dagiti nakalugan iti van.
Naalarma ni Mr. Alonzo isut gapuna a kwinestyunaran na dagiti naka-van no apay ay-ayaban da ti ubing, ngem pinataray dagiti maseknan ti lugan da.
Kuna pay ni Alonzo a kalpasan a nailugan na ti ubing ket ginandat na a kamaten ti van tapno alaen ti plate number na ngem saanna a malasin gapu ta nakusnawen daytoy ken nasipnget pay iti lugar.
Innayon na nga idi mabatog na ti gate da ket nakita na a nagsardeng ti van iti saan unayen nga adayo iti ayan da ngem nagamak a mapan mangasideg gapu ta iniddep dagiti nakalugan ti van.
Kabayatanna, iti pannakarebisar ti CCTV a nakaimuntar iti lugar babaen kadagiti opisyal ti barangay ket makita ti panagtartaray ti ubing a sarsarunwen ti van, ngem apaman a nabatog ti biktima ti day care center nga adda silaw na ket nagsardeng ken eksakto met a sumungad ni Alonzo.
Makita iti CCTV a nagsarita da Alonzo ken ti ubing kalpasan na ket limmuganen ti biktima idinto a ti van ket immadayon iti lugar.
