LAOAG CITY – Maysa nga agtutubo idiay Arizona, U.S.A ti nakaturpos ti doctoral degree iti tawenna a 17.
Idi 2016, nangrugi a simrek iti kolehio ni Dorothy Jean Tillman II para iti Associate’s degree-na iti Psychology iti tawenna a walo. Idi mailippasna ti two-year course daytoy, nangala met daytoy iti Bachelor’s degree iti kurso nga Humanities iti Excelsior College idiay New York.
Idi agturpos isuna iti tawenna a 10, rinugianna met ti Masteral degree-na iti Environmental Science and Sustainable Engineering iti Unity College ken nailippasna daytoy iti tawenna a 14.
Idi maalana ti Masteral degree-na, inpatakderna ti Dorothy Jeanius STEAM Leadership Institute a tumultulong ken manggutgutigut iti ginasut a marigrigat nga agtutubo nga itultuloy ti panangala iti STEAM wenno (science, technology, engineering, arts and mathematics) careers.
Kabayatan a makumikom iti STEAM camp startup, nagdesision ni Dorothy nga ituloy iti Arizona State University ti doctorate degree-na iti Behavioral Health Management Program.
Kalpasan ti dua a tawen, nalpasna daytoy ken nakaaramid isuna ti pakasaritaan iti Arizona State University kas youngest doctoral degree holder iti tawenna laeng a 17.
