LAOAG CITY – Maysa nga agtawen ti 11 nga ubing idiay England ti nakagun-od ti world record gapu iti kinapaspasna nga agukis ti Mandarin orange.
Kinumpirmaran ti records keeping organization a Guinness World Records a ni Taylor Camp ti baro a record holder ti titulo a “Most Mandarins Peeled in One Minute (under 16 years old).” Daytoy ket kalpasan a makaukis ti uppat a mandarin orange iti uneg ti maysa a minuto.
Naipatangatang iti live ti record attempt ni Camp iti online program a Dave Berry Breakfast Show no sadino kadagiti practice run ni Camp, naaramidna a makaukis ti walo nga orange ngem idi adda isunan iti on-air actual attempt, uppat laengen ti kinabaelanna a maukisan.
Segun iti ina ni Camp, nagbalin nga eksperto iti panagukis ti anakna gapu ta masansan nga adda ti mandarin orange iti pagtaenganda ken paboritona daytoy a prutas.
