LAOAG CITY – Inpetteng ni Barangay Chairman Eugene Casil iti Barangay Libtong iti ili ti Bacarra nga addan ti ummuna nga addang da seknan iti naireklamo a maipagarop a nabangsit nga ubong ti baboy ken asideg kadagiti kabalbalayan.
Segun kenni Casil, sakbay a nag-lockdown ti barangay da gapo iti covid-19, binisita na kadua na ti Sanidad iti nasao a pagtaraknan ti baboy.
Kunana nga inikkan ti Sanidad ti makalawas a pawayway ti agtagikua ubong ti baboy a mangaramid ti pakaipanan dagiti rugit ti baboy.
Inlawlawag na nga adda met ti nagbaliwan ti mairekreklamo nga ubong ti baboy ngem saanen a naulit a nabisita ti Sandidad gapo iti pannakaipatungpal ti lockdown iti barangay da.
Inadmitir ni Casil a ti ubong ti baboy ket asideg a mismo iti pagtaengan ti agtagikua ken adda dagiti pagtaengan a saan unay nga adayo iti ubong.
Nupay kasta, kuna ti kapitan nga awan ti mapmapan kenkuana nga agireklamo iti daytoy a banag ken patien na a saan da a nagliway.
Mainaig iti daytoy, inbatad ni Casil nga adda ti ordinansa ti barangay da a dua agingga iti tallo laeng a baboy ti taraknen ti kada balay.
