LAOAG CITY – Inpetteng ni Barangay Chairman Alen Alegado iti Barangay Masintoc iti ili ti Paoay a maiparit ti panagtaraken ti baboy iti asideg ti pagtaengan.
Daytoy ket kalpasan ti dimmanon a report ditoy Bombo Radyo Laoag nga adda ti maysa nga ubong ti baboy nga arig na ket pader laeng ti nagbaetan na iti pagtaengan.
Nabigbig ti agtagikua iti ubong wenno akin taraken kadagiti baboy a ni Mrs. Shionita Galitano.
Iti panagturong ti grupo ti Bombo Radyo iti nadakamat a barangay ket nakita a mismo nga adda ti uppat a baboy a nakapupok iti ubong ken asideg kadagiti pagtaengan.
Segun met kenni Alegado, adda ti ordinansa da a ti ubong ti baboy ket masapol nga adayo kadgaiti pagtaengan ken maysa wenno dua a baboy laeng ti mabalin a taraknen ti maysa a pagtaengan.
Inlawlawag na pay nga inikkan da ni Galitano ti tsansa tapno mailako dagiti baboy.
Inbatad met ni Galitano a naipatakder ti ubong ti baboy idi pay laeng 1990’s ken adda dagiti gundaway nga awan ti taraken na.
