LAOAG CITY – Pimmusay ti Ugandan Marathon Runner a ni Rebecca Cheptegei a nakisalip laeng iti kaliplippas a 2024 Paris Olympics idi napan a bulan kalpasan a pinuoran isuna ti nobiona.
Daytoy ti pinasingkedan ti Athletics Federation iti nasao a pagilyan.
Segun iti Uganda Athletics Federation, maladingitanda unay a nangipakaammo iti ipapatay ti atletada, a ni Cheptegei no sadino a nagbalin a biktima ti domestic violence.
Kinunada a kas maysa a pederasion, kondenarenda dagiti kakastoy nga aramid kabayatan ti panangiyikkis da iti hustisia.
Kabayatanna, nagbalin a kritikal ti kasasaad ni Cheptegei kalpasan a nagsagaba iti agraup 75% a pannakauram iti bagina kasaruno ti panangraut iti balayna iti western Trans Nzoia County.
