LAOAG CITY – Nagballaag ni Ugandan President Yoweri Museveni kadagiti demonstrador a makiay-ayam da ti apoy no ituloy da ti plano da nga anti-corruption march agingga iti parliament.
Basar iti report, agsagsagana dagiti agtutubo idiay Uganda para iti panagmartsa da agingga iti parliamento tapno ipanawagan ti naan-anay a pannakaparmek ti korapsyon iti gobierno.
Rumrumuar a dagiti demonstrador ket inspirasyon da dagiti counterparts da iti Kenya a nangorganisar ti mass demonstrations a nangpwersa ken ni President William Ruto nga ibasura na ti plano a pannakaipangato ti buwis dagiti magatgatang iti pagilian da.
Iti televised address, binallaagan ni Museveni dagiti Ugandan organisers a ti plano da a panangiyuswat ti tignay-protesta ket saanna nga i-tolerate.
Inakusaran pay ti presidente dagiti protest organisers a makikunkunsabo da kadagiti gangannaet tapno mangriribok iti Uganda.
