LAOAG CITY – Inistorya ni Mayor Francis Espiritu iti ili ti Dumalneg no kasanu da a nabirukan ni Sang bayan member Pedro Cascayan iti nasao nga ili kalpasan ti lima nga aldaw a pannakaiyuswat ti search ken rescue operation.
Inlawlawag ni Mayor Espiritu a nakita iti baba ti bantay iti paset ti sitio Sarsarguelas iti Barangau Isic-Isic iti ili ti Vintar ni Cascayan.
Kuna na a basar iti nagbalin a palawag ni Cascayan, naengganyo a nagala ti rattan gapu iti kaado na agingga a saanna a napuutan a nakaadayon ken saannan nga ammo ti lokasyon na.
Inrakurak ni Mayor Espiritu nga adda paylaeng ti signal ti cellphone iti lokasyon ti konsehal idi agbalaw gapu ta saannan a masurutan ti ayan na rason a nagtext kenkuana tapno ipakaammo iti sitwasyon na.
Malaksid iti mayor, natawagan pay ni Konsehal Cascayan ti pamilya tapno ipakaammo a naiyaw-awan ken adda iti kabanbantayan a paset ti Barangay Isic-Isic iti ili ti Vintar.
Gapu iti daytoy, dagus a nagkiddaw ti tulong ti mayor iti Philippine National Police iti ili ti Dumalneg.
Timmulong met iti naiyuswat a search ken rescue operation ti Municipal Incident Command System (MICS), Marine Batallion a nakadestino iti ili ti Pagudpud nga idadauluan ni Lt. Rommel Villamino; adda pay ti inbaon ni Ilocos Norte Police Provincial Director Police Col. Frederick Obar a kameng ti pulisiya a naggapu iti Provincial Mobile Force Company nga indauluan ni P/Cpl. Jed Sta. Maria, pakairamanan ti Regional Mobile Force Batallion manipud iti ili ti Bangui, Bureau Fire Protection, Barangay Officials, Municipal Officials ken dagiti volunteers.
Inbatad ti mayor nga adda pay ti K9 nga inpaay ti Marine Batallion tapno isu ti katulungan da nga agsawar iti bantay.
Nagyaman pay ti mayor kada Governor Matthew Marcos-Manotoc ken ni Congressman Sandro Marcos gapu iti panangipaay da ti helicopter a nagsawar iti kabanbantayan a paset iti ili ti Dumalneg ken Vintar para iti al-alisto a pannakabiruk ken ni Konsehal Cascayan.
Mamati ni Mayor Espiritu a dakkel a nakatulong dagiti uggot ti rattan ken ni Cascayan gapu ta dagitoy ti inpapauneg na kabayatan nga adda iti bantay.
Mainaig iti daytoy, kuna ti mayor a nadakamat pay ni Cascayan nga inaramid na amin a kabaelan na tapno makasubli iti ili ti Dumalneg ngem gapu ta matikaw unayen ket ad-adda laeng nga immadayo iti agtultuloy a pannagna na no sadinno nga aginana laeng ni Cascayan iti rabii.
Innayonna a maymaysa laeng ti adda iti panunot na ti nasao a konsehal iti kaadda na iti bantay, daytoy ket ti makasubli iti ili ti Dumalneg.
Naaoan a daytoyen ti maikatlo a termino ni Cascayan kas konsehal iti ili ti Dumalneg.
