LAOAG CITY – Nagpanawagan ni United Kingdom Prime Minister Keir Starmer iti Iran nga agsubli iti negotiating table kalpasan a binomba ti Estados Unidos ti tallo a nuclear facility ti pagilian.
Iti statement, inpetteng ni Starmer a ti kinatalged iti rehiyon ti kangrunaan a prayoridad ken inawagan na ti nuclear program ti Iran kas maysa a dakkel a pangta iti international security.
Basar iti report, awan ti direkta a partisipasyon ti United Kingdom kadagiti panagatake ngem naabisoan ni Starmer sakbay a naisayangkat daytoy.
Kuna na a naibaga kenkuana ti Estados Unidos a nangiyuswat da kadagiti airstrike kadagiti nuclear site ti Iran iti Natanz, Isfahan, ken Fordo.
Immunan nga inpanakkel ni US President Donald Trump a nagballigi ti operasyon da kontra iti Iran.
Kabayatanna, naiget a kinondenar ti Iran ti inaramid ti Amerika ken inawagan daytoy ni Iranian Foreign Minister Seyed Abbas Araghchi a nadamsak ken adda ti maiyannatop nga epekto.
Iti pay maysa a post, inpalgak ni Araghchi a rumbeng a maalarma dagiti miembro ti United Nations iti narisgo ken illegal nga inaramid ti Estados Unidos.
