LAOAG CITY – Linukatanen ti gobierno ti Ukraine ti baro a sistema ti iseserrek dagiti agad-adal iti Kharkiv no sadinno a naipatakder daytoy iti babaen ti daga gapu iti agtultuloy a panangbomba ti Russia iti nadakamat a pagilian.
Basar iti lokal a gobierno, adda iti 17,000 nga estudyante ti ages-eskwela iti agdama iti pito nga underground schools iti ciudad idinto a tallo pay a pagadalan ti manamnama a malukatan iti sumaruno a tawen.
Uray ti sumagmamano nga istasyon ti train ket inaramid a temporaryo a classroom tapno maisubli iti normal a panagbiag dagiti ubbing.
Nupay adda ti namnama a makapagsarita ti Ukraine ke Russia para iti kapya, ado dagiti nagannak a maawat da a mabayag pay nga agsubli iti normal ti panagbiagda ngem kayatda a mapadasan dagiti annak da ti aktwal nga iseserrek iti pagadalan.
