LAOAG CITY – Nagiwarasen ti Ukraine kadagiti US-made F-16 fighter jets kalpasan a naawat ti nasao a pagilian dagiti  pakpakauna a donasyon a fighter plane.
Segun ken ni President Volodymyr Zelensky, rinugyanen dagiti Ukrainian pilot ti agipatayab kadagiti nasao a fighter plane ken mangnamnama a mangipaay a dagus ti bentahe dagitoy iti agtultuloy a pannakilaban da iti Russia.
Inpanakkel pay ti Ukrainian president ti idadateng dagiti F-16 iti nasao a pagilian kalpasan ti naunday a panawen a panag-lobby kadagiti kaalyado a pagilian para iti daytoy.
Segun ken ni Zelensky, ipanpanakkel na pay dagiti piloto ti Ukraine a naiget nga agsansanay tapno naan-anayen a mausar dagiti nasao nga aircraft para iti Ukraine.
Nabara met nga inawat ni Ukrainian top commander Oleksandr Syrskyi ti isasangpet dagiti F-16 a patien na a sigurado a mangsalbar iti biag dagiti soldado.
Inrakurak ni Syrskyi a ti kaaddan dagiti F-16 fighter jet ti Ukraine ket mangipasimudaag nga ado dagiti gamit a pakigubat, detachment, ken dagiti aircraft ti Russia nga inusar da a pinangraot ti Ukraine ti kabaelan dan a dadaelen wenno pabettaken.
Iti agdama, awan pay ti inparuk-at ti Ukrainian president no mano nga F-16 fighter jets ti naawat da.
