LAOAG CITY – Kinumpirmaran ti Ukraine nga isuda ti adda iti likudan ti panagpabettak ti rangtay a mamagkamang iti Russia ken Crimean Peninsula.
Basar iti security service ti Ukriane nga adda ti inmulada a bomba iti sirok ti Kerch Bridge.
Ti nasao nga operasion ti panangimula ti bomba ket dimmanon pay ti sumagmamano a bulan sakbay a naan-anay a maipatungpal.
Nagusarda ti 1,100 kilos a pagpabettak isu a nagbalin a nakaro ti pannakadadael ti nasao a rangtay.
Daytoy ti maikatlo a naiget a panangatake ti Ukraine iti vital supply line ti Russia sipod idi nangrugi ti gubat idi 2022.
Ti insidente ket sumagmamano nga aldaw kalpasan ti balligi a drone attack ti Ukraine iti Russia a nakadadaelan dagiti cruise missile carriers ti Russia.
