LAOAG CITY – Inakusaran ni Ukrainian President Volodymyr Zelensky ti Russia ken China iti pananglapped iti isaysayangkatna a Global Peace Summit idiay Switzerland.
Inbatadna nga agtintinnulong dagiti dua a pagilian a gutiguten dagiti pagilian a saanda nga agatendar.
Kunana nga adda dagiti armas nga aggapu idiay China nga intedna iti Russia.
Iti agdama, adda ti 106 a pagilian ti nangibaga a mangipatulodda ti high-level representatives iti nasao a summit.
Gagem ti summit ket tapno magun-od ti food security, nuclear security ken pannakawayawaya dagiti hostage ti Russia.
Immunan nga inbatad ti China nga awan ti kankanununganda iti Ukraine ken Russia ngem adu a pagilian ti saan a mamati.
