LAOAG CITY – Umabot iti 10.8 milyon a mobile number ti na-blacklist idinto a 2.3 milyon a SIM cards ti na-deactivate ita a tawen gapu ta maipagarop a maus-usar dagitoy iti cyber fraud.
Daytoy ti inbatad ti Department of Information and Communications Technology (DICT).
Iti Senate plenary budget deliberations, inbatad ti Department of Information and Communications Technology a nalapdan ti National Telecommunications Commission (NTC) ti nasurok a 2.2 bilyon a text messages nga inpatulod dagiti scammer a karaman iti nagduduma a fraudulent activities.
Segun ken ni Senador Sherwin Gatchalian, sponsor ti budget ti Department of Information and Communications Technology para iti 2025, natungpal ti pammilin ti National Telecommunications Commission kadagiti telecommunication company a paigetan ti panagisyu ti SIM cards.
Innayon ni Gatchalian a binilinen ti state regulator dagiti telecommunication companies nga i-upgrade ti teknolohiya da tapno maestablisar ti fraudulent registration ti SIM cards, kalpasan ti report ti National Bureau of Investigation (NBI) a nakapagrehistro ti SIM card babaen ti panagusar na laeng ti ladawan ti sunggo.
