LAOAG CITY – Umabot iti 12 a tattao ti kumpirmado a natay kalpasan ti nagpatpatnag a panangipabanto ti Russia ti sumagmamano a drones ken missiles iti ciudad ti Kyiv idiay Ukraine.
Naamoan a karaman kadagiti nairekord a natay ket tallo nga ubbing idinto a dinosdosena a sabsabali dagiti nasugatan iti insidente.
Ti napasamak a panagatake ti maikadwa a large-scale assault iti pagilian iti uneg ti 48 nga oras no sadinno a ti immuna ket idi damo ti rumaot ti Russia.
Mainaig iti daytoy, inrakurak ni Ukrainian President Volodymyr Zelensky nga agtitinnulong dagiti rescuers iti nasurok a 30 a ciudad ken villages kalpasan ti “massive” strike.
Gapu iti napasamak ket ginutigot manen ti Ukraine dagiti kaalyado na a pagilian nga aplikaran ti nakarkaro a pressure ti Moscow tapno umannugot iti ceasfire.
