LAOAG CITY – Inpakaammo ni Mr. Danilo Arado, Senior Agriculturist ti Provincial Agriculture Office a ti Bagyo Julian ti nakaigapuan ti kadakkelan nga epekto iti sektor ti agrikultura ditoy probinsia ken pinakaro laeng daytoy ti Bagyo Kristine, Bagyo Leon ken Bagyo Marce.
Umabot iti 16,884 hectares ti partially damage idinto 217 hectares ti nairekord a totally damage iti benneg ti agrikultura.
Mainaig iti daytoy, ti gatad ti nadadael no maipapan iti pagay ket mapatta-patta a P4,902,913 ti nadadael, idinto a nga umabot iti P19,178,969 ti gatad iti mais.
Maipalagip a bimmaba ti walo a porsiento ti apit a pagay ditoy probinsia no maidasig idi tawen 2023.
Segun kenkuana, basar iti maaw-awatda a report ket adda laengen ti maap-apit nga average a 4,950 kilos iti kada ektaria a nababbaba ngem 5,430 kilos iti napalabas a tawen.
Inbatadna a posible nga agingga laeng iti 250 a ribu a metriko tonelada nga irik ti maapitda ita a tawen no idasig iti napan a tawen a dimmanon iti 270 a ribu a metriko tonelada nga irik.
Inlawlawagna a dakkel ti impact-na daytoy maipanggep iti kasapulan a suplay ti bagas ditoy probinsia nangruna ket tinawen a ngumatngato ti bilang ti populasion.
