LAOAG CITY – Umabot iti 26 a tattao ti natay kalpasan a timmama ti sumagmamano a napipigsa nga alipugpug iti sumagmamano nga estado iti Estados Unidos.
Naamoan a gapu kadagiti nasao nga insidente ket naruay a pagtaengan ti nadadael ken rinibo a tattao ti napukawan ti suplay ti kuryente.
Basar iti Washington Post, nasurok nga 60 nga alipugpug ti timmama iti sumagmamano a lugar idiay Estados Unidos.
Karaman kadagiti lugar a napakarwan a naapektaran kadagiti napipigsa nga alipugpog ket iti Arkansas, Tennessee, Illinois, Indiana, Alabama ken Mississippi.
Indeklarar ni Governor Sarah Huckabee Sanders ti state of emergency iti estado ti Arkansas kalpasan ti insidente.
Kabayatanna, nagturong a dagus ni US President Joe Biden kadagiti lugar a dinalapos dagiti napipigsa nga alipugpog tapno personal a makipagladingit kadagiti napukawan ti ipatpateg ti biag.
