LAOAG CITY – Umabot iti 30 nga estudyante iti Shamrock Elem School ditoy ciudad ti Laoag ti maipagarop a naglaslas.
Rumrumuar a dagiti nasao nga estudyante ket Grade 5 ken Grade 6.
Iti panagturong ti news team ti Bombo Radyo iti nasao a pagadalan ket kinumpirmaran ti principal a ni Mrs. Cecilia Antonio nga adda ti kastoy a napasamak ngem nagkedked paylaeng a nangipaay ti detalye.
Immuna iti daytoy, inpakaammo ti maysa a mangisursuro iti Ilocos Norte College of Arts and Trades ditoy ciudad nga indanun kenkuana dagiti estudyante na a Grade 10 a nakita da ti inaramid dagiti estudyante iti Shamrock Elem School.
Innayon na a basar kadagiti estudyante na ket mismo nga iti sangwanan ti Ilocos Norte College of Arts and Trades ti naglaslasan dagiti maseknan babaen ti panagusar da ti cutter.
Mainaig iti daytoy, kinumpirmaran pay ti Philippine National Police ditoy ciudad ti Laoag nga adda ti naidanun kadakuada seknan iti maipagarop a panaglaslas dagiti estudyante ngem awan pay ti opisyal a report kadakuada.
Nupay kasta, nagturong dagiti kameng ti pulisya iti pages-eskwelaan dagiti maibagbaga a naglaslas nga estudyante ngem nagkedked dagiti mangimatmaton a mangipaay ti detalye.
Ikarkarigatan ti Bombo Radyo nga amwen ti sibubukel a napasamak kadagiti estudyante iti Shamrock Elem School.
