LAOAG CITY – Awan dagiti napasamak nakaro a problema iti umuna nga aldaw ti panagbakuna dagiti agtawen ti 5 agingga iti 11 nga ubbing kontra iti covid-19 virus ditoy ciudad ti Laoag.
Daytoy ti inbatad ni Miss Giwani Silva, ti mangidadaulo iti Operation Center iti gobierno lokal ditoy ciudad ti Laoag.
Inlawlawag na nga adda laeng dagiti saan a dagus a nabakunaan nga ubbing gapu ta saan nga usto ti naencode a nagan wenno apilyedo da.
Nupay kasta, apaman a naiberipikar dagitoy ket nabakunaan metlaeng a dagus dagiti maseknan.
Mainaig iti daytoy, inpakaammo ni Silva nga iti umuna nga aldaw ti panagbakuna ti nasao nga age group ket umabot iti 300 dagiti nabakunaan ditoy ciudad.
Innayon na nga iti agdama ket adda metten ti nasurok a 2 ribo dagiti nagparehistro nga agpabakuna no sadinno a mangipaneknek daytoy nga ado dagiti nagannak a nakasagana a mangpabakuna kadagiti annak da.
