LAOAG CITY – Umaboten iti 31 a tattao ti natay kalpasan a nagpalto-paltog ti Israel Defense Forces iti asideg ti aid centre iti Gaza no sadinno a naruay dagiti indibidual a mapan agala ti tulong kangrunaan na ti taraon.
Malaksid kadagiti natay, kinumpirmaran ti Red Cross hospital iti Rafah nga adda pay ti 150 a Palestinians ti nasugatan iti insidente.
Mainaig iti daytoy, inrakurak ti Israel Defence Forces nga awan ti ammo da mainaig kadagiti nadangran iti inaramid da iti asideg ti lugar a pakaibunbunungan dagiti tulong, ken inpasingked da a rebisaren da a naimbag ti napasamak.
Maipalagip a nangipatungpal ti Israel ti naan-anay a blockade iti Gaza ken naituloy ti opensiba ti militar kontra iti Hamas idi Marso 18 ita a tawen a nangrakrak ti dua a bolan a ceasefire a nagtitinnulungan nga inurnus ti Estados Unidos, Qatar ken Ehipto.
Ti military campaign keet inyuswat ti Israel iti Gaza kas panagibales da iti Hamas iti iraraot da cross-border idi Oktubre 7, 2023, a nakatayan ti agarop 1,200 a tattao ken 251 a sabsabali ti hinostage ti grupo.
