LAOAG CITY – Umabot iti 32 a tattao ti natay kalpasan a nauram ti drug rehabilitation centre iti northern Iran.
Inbatad ni Esmail Sadeghi, ti provincial chief justice a malaksid kadagiti natay ket adda pay ti nasurok a 16 a sabsabali a nasugatan iti napasamak nga uram iti ciudad ti Langarud iti Caspian Sea province iti Gilan north ti Tehran.
Basar iti inisyal nga imbestigasyon, nangrugi ti apoy iti heater ken alisto a nagramram iti dadduma a paset ti center.
Naamoan nga umabot iti 40 nga indibidual ti ak-akomodaren ti nasao a center.
Immunan a nangipataw ti Iran ti dusa a patay kadagiti repeat drug smugglers ken dealers ngem mangipatpatungpal ti naruay a rehabilitation programmes para kadagiti adik.
