LAOAG CITY – Inpakaammo ni Atty. Joel Gines, ti provincial election officer ditoy probinsya nga umabot iti 350 dagiti nanggundaway ti Local Absentee Voting (LAV).
Inpakaammo ni Gines a manipod iti nasao a bilang, walo dagiti nanggundaway nga empleado ti COMELEC, 28 iti airforce, 51 iti PNP-Aviation ken 263 met a kameng ti Ilocos Norte Police Provincial Office (INPPO).
Immuna iti daytoy, inlawlawag ti provincial election officer a manual wenno naisurat dagiti kandidato a binutosan dagiti botante ken dagiti laeng agpaidasig iti national ti nabutosan.
Adda ti nagserbi nga electoral board iti tunggal opisina ken isuda ti nangasistir kadagiti botante.
Innayun na a kalpasan ti panagbutos ket dagus a naselyoan ti balota ken maipatulod iti Committee on Local Absentee Voters iti Metro Manila para iti pannakainayun na iti counting iti May 9, 2022 election.
Nangrugi ti tallo nga aldaw nga LAV idi Abril 27 nagpatingga idi kalman, Abril 29.
Kangrunaan a nagaplikar para iti LAV ket dagiti militar, pulis agraman dagiti personnel ti gobierno ken media.
