LAOAG CITY – Umabot iti 400 a ribo a tattao ti nagtitipon iti Vatican City iti pannakaitabon ni Pope Francis idi kalman.
Karaman kadagiti nagatendar iti pannakaitabon ti santo papa ket dagiti naruay a world leaders ken dignitaries, pakairamanan ni US President Donald Trump, Ukrainian President Volodymyr Zelensky, Prince William ken dadduma pay.
Malaksid kadagiti nagatendar a mismo iti seremonya iti St Peter’s Square ket naruay pay dagiti tattao a naglilinya iti kalsada tapno makita iti maudi a gundaway ti lungon ti Santo papa kabayatan ti pannakaibiyahe na iti Santa Maria Maggiore church nga isu ti nakaitabonan na.
Maipalagip nga iti final testament, kiniddaw ni Pope Francis a maitabon iti nagbaetan ti Chapel of the Salus Populi Romani ken Sforza Chapel, a naipalaon iti Basilica of Saint Mary Major iti Roma imbes nga iti Grotto iti St. Peter’s Basilica.
Ni Pope Francis ti kaunaan a Santo Papa a naitabon iti ruwar ti Vatican iti uneg ti agarop maysa a siglo.
Kiniddaw pay ti Santo Papa nga agbalin a simple ti pakaitaneman na ken awan ti partikular nga ornamentation ken ti laeng inscription na a “Franciscus”.
Ti St. Mary Major ket espesyal iti pimmusay a Santo Papa gapu iti debosyon na ken ni Mary nga ina ti Diyos.
Ditoy a masansan nga agkararag ni Pope Francis sakbay ken kalpasan kadagiti biyahe na iti sabali a pagilian.
Kabayatanna, immunan nga inrakurak ti Vatican a mabalin a bisitaen ti publiko ti nakaitaneman ni Pope Francis mangrugi iti bigat ti Domingo, Abril 27.
