LAOAG CITY – Inbatad ni Police Lt. Col. Andrew Rabang, ti chief of police ditoy ciudad ti Laoag nga umabot iti 441 nga indibidual ti natiliw gapu iti panagsalungasing da iti linteg trapiko iti uneg ti makalawas.
Kuna na a kadagupan ti nasao a bilang dagiti violators ket agdagup met iti P319,650.00 ti multa dagiti nasao a violators.
Inlawlawag ni Rabang a kaadwan kadagiti nagsalungasing iti linteg trapiko ket dagiti unregistered vehicle, no drivers license, ken dadduma pay kas koma ti saan a panagsuot ti high visibility vest.
Innayon na a ti kaaduan a wagas a pannakatiliw dagiti violators ket kabayatan iti pannakaiyuswat dagiti checkpoint ditoy siudad.
Kabayatanna, nagpalagip ni Rabang kadagiti motorista a saan da laengen nga agmaneho no awan ti driver’s License da ken saan da nga us-usaren dagiti lugan da no saan a nakarehistro.
