LAOAG CITY – Nakarekobre dagiti otoridad ti 45 a sachet ti mapapati a naglaon ti shabu iti igid ti kalsada partikular iti bisinidad ti Brgy. 20 iti ili ti Sarrat ditoy probinsia ti Ilocos Norte.
Segun ken ni Mr. Mardy Ignacio, agtawen ti 28, awanan asawa, street vendor, agdama a residente iti Brgy. Palpalicong iti siudad ti Batac, agtutubi manipud iti Pampanga ket nakitana dagiti naiwaras a sachet bayat ti pannagnana manipud Sto. Tomas nga agturong iti ili ti Piddig.
Innayonna a kabayatan ti pannagna na ket adda ti nakitana a maysa a papel a nalukatan ket ditoy na a nakita nga adda dagiti mapapati a shabu a nakaiwara iti igid ti kalsada.
Inbatadna a plano na kuma dumawat iti contact number dagiti otoridad iti maysa a carenderia ngem adda dagti nagsaredeng a patrol manipud iti ili ti Piddig ket dagosna daytoy nga in-report kadakuada.
Kabayatanna, agtultuloy ti naan-anay nga imbestigasion ti Philippine National Police iti ili ti Sarrat, nga idauluan ni P/Cpt. Kester Arellano maipanggep iti nasao nga insidente.
Iti agdama, maisubmitir dagiti narekobre a sachet a naglaon ti mapapati a shabu iti Crime Laboratory Office ti Ilocos Norte Police Provincial Office tapno maammuan no pudno a shabu daytoy.
