Umabot iti 600 a kilo ti karne ti baboy a maatap a kontaminado iti African Swife Fever ti nakumpiskar iti border checkpoint iti ili ti Badoc.
Segun kenni Dr. Loida Valenzuela, Provincial Veterinarian, nasalamaan ti truck a nakailuganan dagiti karne ti baboy a naggapo idiay Bulacan nga addaan ti kaso ti ASF ken maipan kuma iti siudad ti Batac.
Inbatadna a saan nga agpada ti naipakita iti dokumento a kinarga a karne ti truck ken ti mismo a produkto a nakumpiskar.
Segun kenni Mr. Jeron Mamuad, Livestock Inspector I, idi nainspeksyon dagiti karton a naikkan ti label a beef siomai ket karne ti baboy ti linaon na.
Innayun na a kumpleto met dagiti dokumento kas iti delivery receipt, national meat inspection service certificate ngem adda pay ti karga a tsinelas iti kada plastic wares ti truck.
Gapu iti daytoy, napuoran dagiti nakumpiskar a karne ken pork products a nakumpiskar iti disposal area iti ili ti Badoc.
Iti agdama ket kitkitaen dagiti otoridad no ania ti reklamo a maipila kontra kadagiti maseknan ken manamnama a dakkel iti maipataw a multa iti pannakakumpiskar dagiti karne.
