LAOAG CITY – Umabot iti 66 nga indibidual ti nagtalinaed a mapukpukaw, maysa a lawas kalpasan ti flash floods a timmama iti estado ti Uttarakhand iti northern India.
Iti statement, agarop kagudua ti Dharali village ti naminpinsan a nagaburan ti daga iti napasamak a mudslide nga intunda ti napigsa a tudo ken flash floods.
Naamoan nga uray ti kampo dagiti soldado iti asideg ti lugar ket nagpasar ti nakaro a perdisyon.
Agtultuloy met ti rescue operations iti lugar para kadagiti mapukpukaw a residente.
Nupay kasta, limitado laeng ti panagtrabaho dagiti rescuers gapu iti dakes a sasaaden ti panawen no sadinno a naserraan pay dagiti kangrunaan a kalsada gapu iti mudslide.
Adda metten ti agarop 1,300 a tattao ti naisalakan manipod iti asideg ti Dharali sipud pay iti napalabas a lawas.
