LAOAG CITY – Umabot iti 72 mega watts ti maus-usar a kuryente ditoy probinsia ita a panawen ti kalgaw.
Segun kenni Acting General Manager Perry Martinez iti Ilocos Norte Electric Cooperative, ti dati a minimum a maus-usar ket 40 mega watts ngem ita a panawen ti kalgaw ket 52 agingga iti 72 mega watts.
Inlawlawag na nga alisto ti panag-develop ti probinsia, malaksid iti panagado dagiti maus-usar nga appliances.
Innayon na a possible nga ad-adon to manen ti mausar a kuryente iti panaglukat ti dakkel a mall ditoy ciudad ti Laoag no sadinno a 7.5 mega watts ti makonsumo na.
Nupay kasta, inbatad na nga adda ti nayun a substation iti ili ti San Nicolas a paggapwan ti kuryente ti nasao nga establishimento.
Kabayatanna, inpakaammo na a ti kooperatiba ket adda iti nasayaat a kasasaad, adda man dagiti karit ngem in-inot a makarek-rekobre.
