LAOAG CITY – Inpakaammo ni Mr. Marcel Tabije, ti mangidadaulo iti Provincial Disaster Risk Reduction Management Office ditoy probinsiya nga idi pay laeng biernes, Hulyo 21 a namandar dagiti Local government units nga agsagana iti epekto ti Super Typhoon Egay.
Kuna na nga iti agdama ket adda iti nasurok 3,000 a relief packs a naka-preposition kadagiti nagduduma nga ili kas iti ili ti Pagudpud, Pasuquin, Banna, Solsona, Currimao ken iti ciudad ti Batac a mabalin a maibunong iti aniaman nga oras no kasapulan.
Inbatad na a no bilang adda ti panagkurang dagiti relief packs ket adda pay ti mabalin a maala manipod iti Provincial Social Welfare and Development Office.
Kabayatanna, inpakaammo ni Tabije nga iti agdama ket addan iti 97 a pamilya wenno 362 nga indibidwal a naibakwit.
Agpapan ita ket awan pay ti naireport iti gobierno probinsyal a perdisyon iti benneg ti agricultura ken imprastractura gapu iti iduduprak ti Super Typhoon Egay.
