LAOAG CITY – Inpakaammo ni Engr. Randy Nicolas, Officer in Chief ti Provincial Disaster Risk Reduction Management Office nga umaboten ti P471,076,885 ti nairekord a pakabuklan dagiti nadadael iti benneg ti agrikultura ken infrastructure project gapu iti Bagyo Julian.
Segun kenkuana, ti nairekord a pannakadadael iti sektor ti agrikultura ket umabot iti P86,755,168, manipud iti datos ti Provincial Agriculture Office ken Provincial Veterinary Office.
Kabayatanna, umabot iti P384,321,717 ti nadadael iti imprastruktura, maibasar iti datos manipud iti Provincial Engineering Office ken Department of Public Works and Highways (DPWH).
Inlawlawagna pay a saan pay a karaman iti nairekord a datos dagiti report manipud kadagiti sumagmamano a Local Government Units (LGUs) maipapan iti agrikultura ken imprastruktura no sadinno kasapulan pay laeng a mapasingkedan dagitoy gapu ta mabalin a sobra ti nairekord nga assessmentda kas iti ili ti Paoay no sadinno a dimmanon iti P784 milion ti nadadael iti sektor ti imprastruktura.
Nupay kasta, inpetteng ni Nicolas a no kitkitaen ti lokal a gobierno iti ili ti Paoay ket awan ti nadakamat a gatad ti infrastructure projects a naipatakder iti nasao nga ili rason masapol a kumpirmaranda nga ummuna daytoy.
Mainaig iti daytoy, basar iti datos manipud iti ili ti Dumalneg ket adda ti upaat a barangay wenno pakabuklan a 924 a pamilia wenno 3,203 nga indibidual ti naapektaran.
Nupay kasta, kinunana a saan pay a masinunuo no kasano a naapektaran dagitoy gapu iti iduduprak ti Bagyo Julian rason a kumipirmaran ti opisinda daytoy a banag.
Kinunana a basar iti iggemda nga inisial a datos kaaduan naperdi nga infrastructure projects ket dagiti kalsada, rangtay ken flood control.
Innayonna a dagitoy a pannakadadael ket resulta dagiti immun-una a bagyo nga ad-adda a pinakaro ti Bagyo Julian.
Inpakaammo ni Nicolas nga adda ti 33 a pagtaengan ti partially damaged no sadinno, 29 manipud iti ili ti Batac, 3 manipud iti ili ti Vintar, ken 1 manipud iti ili ti Banna idinto a dua ti naipadamag a casualties, maysa manipud Batac ken maysa manipud Laoag no sadinno a subject for validation ti nasao a datos.
Iti agdama, agtultuloy ti koordinasion ti gobierno probinsial para iti relief operations, ken naipamaysa iti pannakaiwaras ti tulong kadagiti agkasapulan nga residente ken maiparparegta met ti dagus a pannakaiwaras dagiti relief goods kadagiti apektado a komunidad ditoy probinsia gubuay ti Bagyo Julian.
