LAOAG CITY – Umabot iti siyam a tattao dagiti nairekord a natay iti napasamak nga stampede iti football stadium idiay El Salvador.
Segun kadagiti otoridad, pito a lallaki ken dua a babbai dagiti pimmusay ken kaadduan kadagitoy ket agtawen ti 18 agpangato.
Basar iti inisyal nga imbestigasyon ti San Salvador officials, napasamak ti stampede kabayatan ti laban ti local team nga Alianza ken Santa Ana iti Monumental Stadium.
Rumrumuar a namunganay ti stampede iti pananggandat ti sumagmamano a fans a sumrek iti venue nu pay nairikepen ti gate.
Inpakaammo dagiti opisyal a gapu iti kaado ti tattao a kayat na a sumrek iti venue ket ado dagiti naipit ken naipasirok iti metal tunnel idinto a dagiti dadduma ket balligi a nakastrek iti lugar.
Gapu iti daytoy, kun ni el Salvador President Nayib Bukele a maiyuswat ti naiget nga imbestigasyon ken mapatawan ti pannusa ti maduktalan nga adda iti likudan ti pannakairugi ti napasamak nga stampede.
Naamoan a dagiti dua a team nga aglaban idi napasamak ti insidente ket mapili kadagitoy ti sumrek iti quarter-finals clash iti premier division ti pagilian.
