LAOAG CITY – Umabot ti 1.1 milyon a pisos ti magasgastos ti gobierno lokal ditoy ciudad ti Laoag iti kuryente iti kada bolan.
Daytoy ti naamoan ni Konsehal Jason Perera manipod iti General Service Office ditoy ciudad ti Laoag.
Gapu iti daytoy, kuna na nga ad-adalen da no maiyannatop ti pannakainstolar kadagiti solar panels nga isu ti alternatibo a pangalaan ti gobierno lokal ti kuryente.
Inbatad ni Perera a rumrumuar iti panagadal na nga umab-abot iti 600 ribo a pisos ti mabalin a mainot ti gobierno lokal iti kada bolan no aramiden da daytoy.
Innayon na a napintas daytoy nga addang tapno matungpal ti kalikagom ni Presidente Ferdinand Marcos Jr. nga aginot ti kuryente gapu iti agtultuloy a panagngato ti presyo ti langis, nga epekto ti mapaspasamak a gubat idiay Middle East.
Kabayatanna, inrakurak ni Perera ti suporta na iti kalikagum ni Vice mayor Rey Carlos Fariñas a maisubli iti 5 nga aldaw a panagtrabaho dagiti empleado ti city government.
Inkalintegan na a no kitaen ti executive order ni Presidente Marcos Jr. ket naidirekta daytoy kadagiti national agencies no sadinno a saan met a karaman dagiti Local Government Units.
Kuna na pay a no kitkitaen ti local government code ket saan a kontrolado ti presidente dagiti lokal a gobierno gapo ta saan da a pasaet ti executive branch.
