LAOAG CITY – Kinumpirmaran ni Police Lt. Col. Rely Layug, mangidadaulo iti Police Community Relations Office iti INPPO, nga adda ti naawat da a report seknan ti pannakaus-usar ti nagan ni Governor Matthew Marcos Manotoc iti panagsolicit kadagiti adda ti kaya na iti panagbiag.
Kuna na nga adda ti nagpammarang nga isuna ti gobernador ket nagdawat ti gatad kadagiti maseknan ken naideposito iti BPI account.
Segun kenni Layug, dua dagiti naireport kadakuada a biktima ti nagpammarang a gobernador.
Nadawatan da ti sag-100 a ribo a pisos wenno agdagup iti 200 a ribo a pisos.
Kuna na a saan da pay a nakasarita dagiti dua a biktima a negosyante no kasano iti nagbalin a saritaan wenno transakiyon ken dadduma pay a detalye ti insidente.
Nagpalagip ni Layug iti publiko nga agbalin nga alerto kadagiti agdawdawat ti gatad ken masapul a maam-ammo da a naimbag.
Innayon na a saan a kabaelan ti gobernador nga aramiden ti panangloko iti padana a tao.
