LAOAG CITY – Umaboten iti 109 nga Overseas Filipino Workers ti agkalikagom nga agawiden iti Pilipinas gapu iti mapaspasamak a tensyon iti nagbaetan ti Israel ken Iran.
Daytoy ti inpakaammo ni Department of Migrant Workers (DMW) Secretary Hans Cacdac.
Iti interview, kinumpirmaran ni Cacdac a ti team ti gobierno ket nakasubaybay kadagiti apektado a Pilipino karaman dagiti nadangran iti iraraot ti Iran iti Israel idi weekend.
Segun ken ni Cacdac, nagtalinaed a kritikal ti maysa a Pilipino idiay Israel nga iti agdama ket banbantayan ti kabsat na iti ospital.
Inkari na nga agtultuloy ti panangipaay ti tulong ti gobierno ti Pilipinas kadagiti nadangran a Pilipino gapu iti mapaspasamak a riribok iti nagbaetan ti Israel ken Iran.
Malaksid kadagiti naospital, adda metten ti naipaay a tulong kadagiti 14 a Pilipino nga apektado iti tensyon a naikabil iti temporary accommodations.
Iti agdama, inpakaammo ni Cacdac nga agtultuloy ti koordinasyon ti gobierno para iti repatriation ngem aminado ti opisyal a marigatan da gapu ta nagtalinaed a nakaserra ti airspace ken adda ti airport restrictions iti conflict zones.
