LAOAG CITY – Inpakaammo Dr. Rickson Balalio, officer in charge ti Provincial Health Office nga adda ti 13 suspected deaths ti rabies ditoy probinsia.
Segun kenni Balalio, sipud iti bulan ti Marso agingga iti Oktubre ket adda ti sagdudua a natay iti ili ti Badoc, Paoay Laoag City ken Sarrat ken saggaysa met iti Dingras, Paoay, Solsona, Nueva Era, Batac ken Banna.
Nupay kasta, inbatad na nga adda metten ti suplay ti anti-rabies vaccine ditoy probinsya nga umabot iti 1,894 vials para kadagiti kakailian nga agkasapulan ti bakuna.
Mainaig iti daytoy, binalakadan ni Balalio ti publiko a no makagat iti aso ket agturong a dagus iti ospital gapo ta ti bakuna ket maipaay a libre ken tapno saanen a manayunan ti mairekord a matay gapo iti rabies.
Malaksid iti daytoy, binalakadan na met dagiti addaan ti taraken nga agbalin a responsable babaen iti panangpabakuna dagitoy.
Kabayatanna, kuna ni Balalio a sumurot kadagiti pagadalana tapno maliklikan ti panagngato ti kaso ti animal bites.
