LAOAG CITY – Umaboten iti 150 a tattao ti natay ken nasurok a 100 a sabsabali dagiti nasugatan kalpasan ti napasamak a layos iti northern Afghanistan.
Malaksid kadagiti natay ken nasugatan ket adda pay dinosdosena dagiti nagtalinaed a mapukpukaw kalpasan ti layos gapu iti panagtudtudo na ti napigsa iti lima a distrito iti probinsya ti Baghlan.
Basar iti report, possible a ngumato pay ti bilang dagiti natay gapu iti kaado dagiti nagtalinaed a mapukpukaw idinto a dagiti dadduma a nasugatan ket kritikal ti kondisyon da.
Inpakaammo ti pannakangiwat ti Interior ministry a ni Abdul Mateen Qani a 131 a tattao ti natay iti probinsya ti Baghlan idinto a 20 iti Takhar.
Mainaig iti daytoy, agpapan ita ket nakaserra paylaeng kangrunaan a kalsada a mamagkonektar iti Kabul agingga iti northern Afghanistan.
Agarop met dua ribo a balay, tallo a mosque ken uppat a pagadalan ti nadadael gapu iti insidente.
