LAOAG CITY – Umaboten iti 19 a registered firearms ti naisuko iti nagduduma a police stations iti intero a probinsya sipud nangrugi ti election period idi Enero 12 ita a tawen.
Daytoy ti inbatad ni Police major Sheryll Guzman, ti pannakangiwat iti Ilocos Norte Police Provincial Office (INPPO).
Inlawlawag na a kaadoan kadagiti napan nangisuko ti paltog na ket dagiti kandidato para iti 2025 national ken local election.
Kabayatan na, inpasingked na nga agtultuloy latta ti panangallukoy ken panagpanawagan da kadagiti daduma pay a gun holders a mapan da ipadeposito paylaeng ti paltog da.
Immunan nga inrakurak ni Provincial Director Police Col. Frederick Obar a kalikagom na a maideposito amin a paltog dagiti gun holders iti intero a probinsya tapno maliklikan ti pannakausar dagitoy iti aniaman a krimen agingga a saan a malpas ti Midterm elections.
