LAOAG CITY – Inpakaammo ni Mr. Justin Marbella, ti Regional Communication Officer ti Department of Labor and Employment wenno DOLE nga umaboten iti 2,133 a mangmangged ti nabakunaan kontra iti COVID-19 iti intero a rehion uno.
Segun kenkuana, dakkel ti naitulong ti naisayangkat a 3-Day National Vaccination Drive iti intero a pagilian gapu ta adu dagiti nagutigot ken nainayon kadagiti nabakunaan a formal ken informal workers.
Inbatadna a mabalin pay a ngumato ti nasao a bilang apaman a makompleto ti datos a nakalap dagiti Field Offices.
Inlawlawagna a daytoy ket maysa a direktiba ni Labor Secretary Silvestre Bebot Bello III a #SerbisyongDOLE para kadagiti saan pay a nabakunaan nga agtrabtrabaho iti rehion uno.
Kunana a naiget ti panangitandudu da iti panagbakuna babaen iti panagibunongda ti leaflets kadagiti shopping malls, simbaan, public markets ken dadduma pay a worksites.
Segun ken ni Marbella, nangipaay ti DOLE Regional Office I iti free transport services kadagiti mangmangged nangruna kadagiti disadvantage workers a saan na a kabaelan ti mapan iti vaccination site.
Innayonna a nakipagpaset pay dagiti 313 youth workers nga adda iti babaen ti DOLE Government Internship Program a naidesignar kadagiti nagduduma nga Local Government Units tapno tumulong nga agencode ti real-time data para iti national vaccination database ti DICT.
