LAOAG CITY – Umaboten iti nasurok a 3.1 milyon nga aplikasyon ti naiproseso ti Commission on Elections (Comelec), lima a bolan kalpasan a naituloy ti voter registration period para iti Barangay at Sangguniang Kabataang Elections (BSKE) ita a tawen.
Iti kaudian a datos ti Comelec, addan ti pakabuklan a 3,137,948 applications ti naiproseso agingga idi Marso 14 ita a tawen.
Kaadoan nga aplikasyon ket dagiti babbai nga adda iti 1,633,469 idinto a 1,504,479 met dagiti lallaki.
Segun iti Comelec, nakaawat daytoy ti 135,755 reactivation application manipod iti regular a botante idinto nga 816,138 ti nagaplikar kas baro a botante nga agtawen ti 18 agpangato.
Para iti Sang Kabataan Polls, adda ti pakabuklan nga 899,860 a pilipino, nga agtawen ti 15 agingga iti 17 t nagaplikar kas youth voters.
Mainaig iti daytoy, ti rehiyon nga addaan ti kangatoan a bilang dagiti naawat nga aplikasyon ket ti Region 4-A (Calabarzon) nga addaan ti 537,847, sumaruno ti Region 3 (Central Luzon) nga addaan ti 360,564 ken maikatlo ti National Capital Region (NCR) nga addan met ti 322,054.
Ti panawen iti panagparehistro dagiti botante ket naituloy idi Oktubre 20, 2025 ken agpatingga intono Mayo 18, 2026.
Naikeddeng ti Barangay at Sangguniang Kabataang Elections intono Nobyembre 2 ita a tawen.
