LAOAG CITY – Umaboten iti 200 a tattao ti natay kalpasan a nagswek ti maysa nga Air India plane nga addaan ti 242 a pasahero ken 12 a crew members, sumagmamano a gundaway kalpasan a nagtake-off iti Ahmedabad iti western India.
Naamoan a ti Flight AI171 ket agturong koma iti London Gatwick idi napasamak nga insidente.
Basar iti report, karaman kadagiti nakalugan ket ti 169 nga Indian nationals, 53 a Briton, maysa a Canadian national ken pito a Portuguese nationals.
Inbatad ti Tracking website Flightradar24 a naawat da ti naudi a signal manipod iti aircraft ken 625 a kadapan ti kangato na, sumagmamano a segundo kalpasan a nagtake-off.
Naamoan a nagdisso ti eroplano iti residential area iti asideg iti erupuerto partikular iti doctor’s hostels no sadinno a 50 a medical students ti nasugatan ken manarimaan a maag-agasan iti ospital.
Iti agdama, agtultuloy ti imbestigasyon dagiti otoridad mainaig iti nasao nga insidente.
