LAOAG CITY – Inpakaamo ni PLt. Col. Randy Baoit, pannakangiwat ti Ilocos Norte Police Provincial Office (INPPO) nga umaboten iti 45 ti bilang dagiti nagpakamatay ditoy probinsya ita tawen.
Daytoy ket nangatngato ngem iti 32 a nairekord itay napan a tawen 2019.
Segun ken ni Baoit, kaaduan kadagiti biktima ket manipod kadagiti ili ti Sarrat, Banna, Pasuquin, San Nicolas ken Bacarra pakairamanan ditoy siudad ti Laoag.
Mainaig iti daytoy, inpakaamo na a dagiti kangrunaan a rason ti panagpakamatay ket iti problema ti pamilya, ayat, depresyon ken pannakapukaw ti trabaho iti baet ti pandemiya.
Gapu iti daytoy, inbunannag ni Baoit a masapol nga adda dagiti maaramid nga addang tapno maleppadan ti ad-adda a panagngato ti bilang dagiti agpakpakamatay.
Segun kenkuana, masapol nga adda ti pannakikoordinar dagiti Community on Affairs Unit ti ti INPPO kadagiti Police committee relations iti tunggal PNP station ditoy probinsya pakairamanan ti Family Juvinal Gender and Development Officer ken Women’s and Children Protectiion Desk Officer tapno dagitoy ti agtultuloy nga agpasyar iti nagduduma a barangay.
Inbatad na a babaen daytoy ket maipadanon ti umno nga impormasyon kadagiti bumarangay nangruna kadagiti agtutubo nga isu ti kaauduan nga agar-aramat ti panagpakamatay.
Innayun na a sidadaan pay ti gobierno probinsyal a tumulong iti pannangpugsat ti ideolohiya ti panagpakamatay babaen iti programa nga “speak up I’m hear” nu sadino a mabalin nga ikamang dagiti problema.
Maianaig iti daytoy, kuna ni Baoit nga importante pay ti panagkamang kadagiti pastor wenno padi wenno ti makunkuna a Kasimbahan pakairamanan dagiti psychologists.
Maipalagip a naimaldit dagiti nagsasaruno a kaso ti panagpakamaty ditoy probisnya itay kallabes.
