LAOAG CITY – Umaboten iti 488 a baboy ti naikali iti Barangay San Marcelino iti ili ti Dingras gapu iti African Swine Fever (ASF) virus.
Daytoy ti inbaga ni ABC President Elmer Verdadero iti ili ti Dingras.
Kuna ti ABC Presidente nga iti laeng Barangay San Marcelino ken Barangay San Francisco iti ili ti Dingras ti apektado ti ASF virus.
Inlawlawag na a dagiti 488 a baboy ti naikali iti Barangay San Marcelino ket naggapo iti innem a sitio ken dagiti taraken a baboy manipod kadagiti nabati a sitio ket naalaan ti samples nga iti agdama ket maiyur-uray pay laeng ti resulta ti eksaminasyon.
Inpasingked ni Verdadero a 24 nga oras nga adda ti agbanbatay kadagiti naestablisar a checkpoints kadagiti nadakamat a barangay tapno masigurado nga awan ti basta makairuwar ti taraken na a baboy a maipan iti sabali a lugar.
Innayon na a babaen iti daytoy ket saanen a maiwaras pay ti ASF virus iti sabali a lugar.
